ഇന്നത്തെ ജോലികളെല്ലാം തീർന്നു..

 

സമയം രണ്ടു മണിയായി..

 

അമ്മായി അച്ഛന് ഉച്ചക്കത്തെ മരുന്നു കൊടുത്തു കഴിഞ്ഞ് അവൾ തൻ്റെ മുറിയിലേക്ക് നടന്നു..

 

നാലരക്ക് സ്കൂളിൽ നിന്നും മകൻ വരും..

 

നാലിനെഴുന്നേറ്റ് വൈകുന്നേരത്തേക്കുള്ള പലഹാരമുണ്ടാക്കണം..

 

ഒരു ദിവസം വിശ്രമിക്കാൻ ആകെ കിട്ടുന്നത് രണ്ടു മണിക്കൂർ..

 

വിവാഹം കഴിഞ്ഞിട്ട് ഒൻപത് വർഷമായി..

 

ഇത്ര വർഷത്തിനിടയിലും ഒരു മാറ്റവുമില്ലാതെ തുടരുന്ന തൻ്റെ ജീവിതം..

 

ടൈം ടേബിൾ സെറ്റ് ചെയ്തു വെച്ചിരിക്കുന്ന ഒരു റോബോട്ടിനെ പോലെ..

 

ആദ്യമൊക്കെ ഭയങ്കര ബുദ്ധിമുട്ടായിരുന്നു..

 

വീട്ടിൽ പറഞ്ഞപ്പോൾ അവരുടെ ഉപദേശം.. ആദ്യമൊക്കെ ഇങ്ങനെ ആണെന്ന്.. പിന്നീട് ശീലമായിക്കോളും എന്ന്..

 

അതെ.. അതാണല്ലോ നാട്ടുനടപ്പ്..

 

വല്ല്യുമ്മ അമ്മക്ക് പറഞ്ഞുകൊടുത്ത മന്ത്രം, നാട്ടുനടപ്പ്.. അമ്മ അത് മകൾക്ക് പകർന്നു നൽകി.. ഞാനത് എൻ്റെ രക്തത്തിന് കൊടുക്കണം.. പേര് നാട്ടുനടപ്പ്..

 

തൻ്റെ വിധി..

 

വായിച്ചു നിർത്തിയ പുസ്തകവുമെടുത്ത് ജാസ്മിൻ ബെഡിലേക്ക് ചാഞ്ഞു..

 

‘പ്രേമനഗരം..’ കുടുംബിനിയായ സ്ത്രീയും പത്രപ്രവർത്തകനായ, വിവാഹം കഴിച്ചിട്ടില്ലാത്ത, തന്നെക്കാൾ പ്രായം കുറഞ്ഞ ചെറുപ്പക്കാരനും തമ്മിലുള്ള പ്രണയ കഥ..

 

ഉപാധികളില്ലാത്ത സ്നേഹത്തിൻ്റെ കഥ..

 

സമൂഹമതിനെ അവിഹിതം എന്നു വിളിച്ചേക്കാം.. എന്തൊരു വിരോധാഭാസം..

 

വായിച്ചുകൊണ്ടിരിക്കുമ്പോഴാണ് ഫോണിൽ ഒരു നോട്ടിഫിക്കേഷൻ വന്നത്..

 

ജാസ്മിൻ ഫോണെടുത്ത് നോക്കി..

 

ഫേസ്ബുക്കിൽ ഒരു ഫ്രണ്ട് റിക്വസ്റ്റ് വന്നിരിക്കുന്നു..

 

ജാസ്മിൻ സോഷ്യൽ മീഡിയയിൽ അങ്ങനെ ആക്റ്റീവ് ഒന്നുമല്ല.. ഫേസ്ബുക്ക് എടുത്തിട്ടുതന്നെ മൂന്നു മാസമേ ആയിട്ടുള്ളൂ..

 

ആകെയുള്ള എൻ്റർടെയ്ൻമെൻ്റ് എന്നു പറയുന്നത് പുസ്തക വായനയാണ്. അതും അടുത്തുള്ള പബ്ലിക് ലൈബ്രറിയിൽ നിന്നും എടുത്തു വായിക്കുന്നത്..

 

അവിടെയുള്ള പുസ്തകങ്ങൾ വായിച്ചു തീർന്നപ്പോഴാണ് പുതിയ പുസ്തകങ്ങളെ പരിചയപ്പെടാൻ ഫേസ്ബുക്കിൽ ഒരു അക്കൗണ്ട് എടുക്ക് എന്ന് ലൈബ്രേറിയൻ പറഞ്ഞത്. ധാരാളം ഗ്രൂപ്പുകൾ ഉണ്ടത്രേ.. താല്പര്യം ഇല്ലെങ്കിലും ഒരു അക്കൗണ്ട് എടുത്തു..

 

റിക്വസ്റ്റ് വന്ന പ്രൊഫൈൽ ജാസ്മിൻ ഓപ്പൺ ചെയ്തു നോക്കി..

 

കാർത്തിക് ശങ്കർ..

 

പ്രൊഫൈൽ ഫോട്ടോ എടുത്ത് നോക്കിയപ്പോൾ അവളൊന്നു ഞെട്ടി..

 

കാർത്തിക്..

 

തൻ്റെ കിച്ചു..

 

അല്ല, തൻ്റെ ആയിരുന്ന കിച്ചു..

 

പത്തു വർഷത്തിനു ശേഷമാണ് ഈ പേരുപോലും തൻ്റെ മനസ്സിലേക്ക് വരുന്നത്..

 

തൻ്റെ അയൽക്കാരൻ, കളിക്കൂട്ടുകാരൻ, സഹപാഠി..

 

അവസാനം.. തൻ്റെ കാമുകൻ..

 

ഓർമ്മകളിൽ നിന്നും പുറത്തു വന്ന ജാസ്മിൻ ഒരു നിമിഷം ഫോണിലേക്ക് നോക്കി..

 

എന്തു ചെയ്യണം.. റിക്വസ്റ്റ് കൺഫോം ചെയ്യണോ? അതോ ഡിലീറ്റ് ചെയ്യണോ..?

 

വായിച്ചുകൊണ്ടിരുന്ന പുസ്തകത്തിലേക്കും ഫോണിലേക്കും ജാസ്മിൻ മാറി മാറി നോക്കി..

 

കൺഫോം ചെയ്യാം.. ഒന്നുമില്ലെങ്കിലും ഒരിക്കൽ തൻ്റെ എല്ലാമായിരുന്ന ആളല്ലേ..

 

സുഖ വിവരമെങ്കിലും അന്വേഷിക്കാം..

 

അതുമതി.. അതു മാത്രം മതി..

 

പ്രൊഫൈലിനു നേരെയുള്ള നീല ബോക്സിൽ അവളമർത്തി..

 

റിക്വേസ്റ്റ് കൺഫേമ്ഡ്..

 

പുസ്തകം മാറ്റി വച്ച് അവൾ ഫോണിലേക്ക് ഊളിയിട്ടു..

 

ആകെ രണ്ടു ഫോട്ടോയേ അവൻ്റേതായിട്ടുള്ളു.. അതും സിംഗിൾ..

 

ബാക്കി മുഴുവനും കുറെ പൂക്കളുടേതാണ്..

 

അല്ലെങ്കിലും അവനു പണ്ടു മുതലേ ഉള്ളതാണ് ഈ പൂക്കളോടുള്ള ഇഷ്ടം..

 

വീട്ടിൽ സ്വന്തമായി ഒരു പൂന്തോട്ടംതന്നെ അവനുണ്ടായിരുന്നു..

 

എന്തോ ഓർത്തുകൊണ്ട് അവളൊന്നു പുഞ്ചിരിച്ചു..

 

പണ്ടത്തെ കിച്ചുവിൻ്റെ വിദൂര സാമ്യം മാത്രമേ ഇപ്പോഴുള്ള ഫോട്ടോക്കുള്ളൂ..

 

തഴച്ചു വളർന്ന മുടി.. കട്ടിയുള്ള താടിയും മീശയും.. അകാലനര കേറിയിട്ടുണ്ട്.. ശരീരമൊക്കെ നന്നായി.. പണ്ടത്തെ ക്ഷീണിച്ച ശരീരമല്ല ഇപ്പോൾ.. ഇപ്പോഴവൻ ഒത്ത ഒരു പുരുഷനായി..

 

‘one message received from karthik’ പെട്ടെന്ന് കാർത്തിക്കിൻ്റെ ഒരു മെസ്സേജ് അവൾക്ക് വന്നു..

 

ഒട്ടും ആലോചിക്കാതെ തന്നെ അവളത് ഓപ്പൺ ചെയ്തു..

 

“മിന്നൂ..??”

 

അവളൊന്നു കുടുങ്ങി.. വർഷങ്ങൾക്ക് ശേഷമാണ് അവൻ്റെ ഈ വിളി കേൾക്കുന്നത്..

 

അല്ല, സ്നേഹത്തോടെയുള്ള മറ്റൊരാളുടെ വിളി കേട്ടിട്ടുതന്നെ വർഷങ്ങളായി..

 

മെസ്സേജ് ആണെങ്കിലും അവൻ്റെ ശബ്ദത്തിലാണ് അവളത് വായിച്ചത്..

 

റിപ്ലേ കൊടുക്കണോ? അവളൊന്നു ചിന്തിച്ചു..

 

“കിച്ചൂ..” അവളൊന്നു നീട്ടി വിളിച്ചു..

 

തൻ്റെ ശബ്ദത്തിലാണ് അവനും അത് വായിച്ചതെന്ന് അവൾക്കും മനസിലായി..

 

ഞാൻ ആണല്ലോ അവൻ..

 

അവനാണല്ലോ ഞാൻ..

 

അല്ല..

 

ഞാൻ ആയിരുന്നല്ലോ അവൻ..

 

അവൻ ആയിരുന്നല്ലോ ഞാൻ..

 

Karthik typing..

 

“790*****20”

 

“If you don’t mind..!!” അവൻ്റെ രണ്ടു മെസ്സേജ് അടുപ്പിച്ചു വന്നു..

 

അവളൊന്നു സന്തേഹപ്പെട്ടു..

 

വിളിക്കണോ..??

 

എന്തിന്..??

 

ഒരു കോൾ അല്ലേ.. അതിലിപ്പോൾ എന്തു സംഭവിക്കാൻ ആണ്..??

 

എങ്കിൽ വിളിക്ക്..!!

 

അതെ.. വെറുതെ വിശേഷം അറിയാനല്ലേ.. ഒന്നുമില്ലെങ്കിലും ആ ശബ്ദമൊന്ന് കേൾക്കാമല്ലോ..!!

 

നീ വിളിക്കെന്ന്..!!

 

ജാസ്മിൻ അവളോടു തന്നെ സംസാരിച്ചു..

 

ജാസ്മിൻ നമ്പർ കോപ്പി ചെയ്ത് ഡയൽ പാഡിൽ പേസ്റ്റ് ചെയ്തു..

 

കോൾ ചെയ്യുന്നതിന് മുന്നേ സമയം നോക്കി..

 

02:20pm

 

ഒന്നേ മുക്കാൽ മണിക്കൂർ സമയമുണ്ട്..

 

അവൾ കോൾ ബട്ടണിൽ അമത്തി..

 

“ഒരുനാൾ കിനാവു പൂത്തിടും

അതിൽ നമ്മളൊന്നു ചേർന്നിടും

പിറാക്കൾ പോലിതേ വഴി

നിലാവിൽ പാറിടും..!!” അവൻ്റെ കോളർ ട്യൂൺ കേട്ടപ്പോൾ തന്നെ അവളുടെ ഉള്ളമൊന്ന് കിടുത്തു..

 

വേണ്ടിയിരുന്നില്ല..

 

വിളിക്കേണ്ടിയിരുന്നില്ല..

 

ചിലപ്പോൾ അപകടമാകാം..

 

മറന്ന പലതും ഓർമ്മിക്കപ്പെടാം..

 

പക്ഷേ കോൾ കട്ട് ചെയ്യാനും തോന്നുന്നില്ല..

 

പെട്ടെന്ന് അപ്പുറത്ത് കോൾ എടുത്തു..

 

നിശ്ശബ്ദത..

 

അവൻ സംസാരം തുടങ്ങാനായി ഞാനും ഞാൻ തുടങ്ങാനായി അവനും വെയ്റ്റ് ചെയ്യുകയാണെന്ന് രണ്ടു പേർക്കും മനസ്സിലായി..

 

അവളൊന്നു കാതോർത്തു..

 

കോളിൻ്റെ അങ്ങേ തലക്കൽ നിന്നും യിരൂമയുടെ ‘river flows in you’ കേൾക്കുന്നു..

 

അവളുടെ ഉള്ളം തേങ്ങി..

 

കണ്ണിൽ നനവ് പടർന്നു..

 

തനിക്ക് ഏറ്റവും ഇഷ്ടപ്പെട്ട കമ്പോസിഷൻ..

 

30 സെക്കൻ്റോളം സമയം രണ്ടു പേരും മിണ്ടാതെ നിന്നു..

 

“മിന്നൂ..??” മൗനത്തിൻ്റെ പരിച തകർത്ത് അവൻ്റെ അമ്പു വന്നു..

 

പത്തു വർഷത്തിനു ശേഷമാണ് അവൻ്റെ ശബ്ദം കേൾക്കുന്നത്.. അന്നത്തെ അതേ ശബ്ദം..

 

വീണ്ടും അവൻ്റെ ശബ്ദം കേൾക്കാൻ ജാസ്മിൻ മിണ്ടാതെ നിന്നു..

 

“മിന്നൂ..?? നീ എന്താ മിണ്ടാതെ നിക്കുന്നെ..??” മരുഭൂമിയിൽ മഴ പെയ്യാൻ തുടങ്ങി..

 

“കിച്ചു..!!” അവളൊന്നു തേങ്ങി..

 

“കരയുവാ നീയ്..??” അവൻ്റെ ചോദ്യം.. അതിലും ഒരു സങ്കടം ഉണ്ടായിരുന്നോ..?? അതോ എൻ്റെ തോന്നലാണോ..??

 

“ഹേയ് അല്ല.. കുറെ വർഷത്തിനു ശേഷം ഈ ശബ്ദം കേട്ടപ്പോ.. ഒരു..!!” അവൾക്ക് വാക്കുകൾ മുറിഞ്ഞു..

 

അത് അവനും മനസ്സിലായി..

 

“സുഖമാണോ മിന്നു നിനക്ക്..??” അവൻ പഴയ കൗമാരപ്രായക്കാരനായി..

 

“മം..!!” ഒരു മൂളലിൽ ജാസ്മിൻ മറുപടി ഒതുക്കി..

 

അതിൽ കൂടുതൽ അവൾക്ക് പറ്റുന്നുണ്ടായിരുന്നില്ല..

 

“പത്തു വർഷം.. അല്ലേ..??” അവൻ വാചാലനായി..

 

“അതെ..!!”

 

“മക്കൾ..??”

 

“ഒരു മോൻ..!!”

 

“വയസ്സ്..??”

 

“എട്ട്..!!”

 

“മൂന്നാം ക്ലാസ്സ് അല്ലേ..??”

 

“അതെ..!!”

 

“ഉണ്ടോ അവിടെ..?? മോൻ..??”

 

“ഇല്ല.. സ്കൂളിൽ പോയിരിക്കുവാ..!!”

 

“സിറാജ് എവിടെ..??”

 

അവൾ മിണ്ടാതെയായി..

 

“മിന്നു..??”

 

“എന്തോ..??” ജാസ്മിൻ വിളികേട്ടു..

 

“ഭർത്താവ് എവിടെയെന്ന്..??” കിച്ചു ചോദിച്ചു..

 

“പോയി..!!” ജാസ്മിൻ അത്രമാത്രം പറഞ്ഞു..

 

“ഓഹ്.. ജോലിക്ക് പോയിരിക്കുകയാണോ..??”

 

“അല്ല..!!”

 

“പിന്നെ..??”

 

ജാസ്മിൻ വീണ്ടും മൗനത്തിലാണ്ടു..

 

“മിന്നൂ..??” കിച്ചുവിൻ്റെ വിളി..

 

“ഓൻ ഞങ്ങളെ വിട്ടു പോയി കിച്ചു.. ആറ് വർഷമായി..!!” അത്രമാത്രം പറഞ്ഞ് അവളൊന്നു തേങ്ങി..

 

കാർത്തിക്കിൻ്റെ ചങ്കൊന്നു മിടിച്ചു..

 

അവളെ തന്നിൽ നിന്നും പറിച്ചെടുത്തുകൊണ്ട് പോകുകയായിരുന്നു അവളുടെ വീട്ടുകാർ..

 

നിന്നെക്കാൾ വല്യവനേക്കൊണ്ട് കെട്ടിക്കുമെന്ന് അവളുടെ വീട്ടുകാരും രാജ്ഞിയെ പോലെ വാഴിക്കുമെന്ന് സിറാജും തന്നെ വെല്ലുവിളിക്കുകയായിരുന്നു.. എന്നിട്ട്.. ഇപ്പോൾ..

 

“കിച്ചു..??” അവൻ്റെ മറുപടി ഇല്ലാത്തതിനാൽ ആണെന്ന് തോന്നുന്നു ജാസ്മിൻ അങ്ങോട്ടു വിളിച്ചു..

 

“മം..??”

 

“തട്ടിയെടുത്തിട്ട് എന്തേ ഒറ്റക്കാക്കി പോയി എന്ന് ആലോചിക്കുകയായിരുന്നോ..??” അവളുടെ ചോദ്യം അവനെ ഉലച്ചു കളഞ്ഞു..

 

അവർ പരസ്പരം മനോവിചാരങ്ങൾ അറിയുന്നവരാണല്ലോ..!!

 

“എന്തുപറ്റിയതാ..??” അവൻ ചോദിച്ചു..

 

“ആത്മഹത്യ..!!”

 

രണ്ടുപേരും വീണ്ടും മൗനത്തിൻ്റെ വീഞ്ഞു കുടിച്ചു..

 

ഇതിനുവേണ്ടയായിരുന്നോ എന്നിൽ നിന്നും..

 

“ബിസിനസ് പൊളിഞ്ഞു.. വീട്ടാൻ പറ്റാത്ത രീതിയിൽ കടംകേറി.. സകല സ്ഥാവര ജംഗമ വസ്തുക്കളും വിറ്റിട്ടും കടം തീർന്നില്ല.. അഭിമാനി ആണല്ലോ.. കുടുംബത്തിൽ കേറി ചോദ്യം ഉണ്ടാകുന്നതിന് മുമ്പ്തന്നെ ആളങ്ങ് പോയി.. കുടുംബ സ്വത്തിൽ നിന്നും ഇക്കയുടെ വിഹിതം ചോദിച്ചു വാങ്ങി വിറ്റു കടം വീട്ടി..!!” കിച്ചുവിൻ്റെ മറുപടിയോ ചോദ്യമോ ഒന്നും ഉണ്ടാകാഞ്ഞതുകൊണ്ട് ജാസ്മിൻ തന്നെ അങ്ങോട്ട് പറഞ്ഞു..

 

“ഞാൻ.. ഞാൻ അങ്ങോട്ടു വിളിക്കാം മിന്നൂ..!!” അത്ര മാത്രം പറഞ്ഞ് കിച്ചു കോൾ കട്ട് ചെയ്തു

..

 

കേട്ടത് വിശ്വസിക്കാനാവാതെയുള്ള രക്ഷപ്പെടൽ ആണെന്ന് അവൾക്ക് മനസ്സിലായി..

 

കുറെ നാളുകൾക്ക് ശേഷം അവളുടെ കണ്ണും നിറഞ്ഞൊഴുകി..

 

ഭർത്താവിൻ്റെ ഓർമ്മയിലോ.. കിച്ചുവിൻ്റെ വിളിയിലോ..??

 

അവൾക്ക് മനസ്സിലായില്ല..

 

കണ്ണടച്ച് ജാസ്മിൻ കിടന്നു..

 

÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷

 

തുടരും…